डेनमार्कका भूटानी एक जुट बने

6
186

डेनमार्कका विभिन्न राज्यमा पुनर्वाश भएका नेपालीभाषी भूटानीहरूले अक्टोबर २३ का दिन एउटा सामाजिक संगठन ‘द एसोसिएशन अफ् नेपाली स्पिकिङ भूटानिज इन डेनमार्क’ (एएनएसबीडी) -को स्थापना गरेका छन् ।

नेपाली भाषा- संस्कृति, रीतिरिवाज र डेनमार्कमा पुनर्वाश हुने नयाँ भूटानीहरूको संरक्षण र सहायताका लागि नेपालीभाषी भूटानीले यो संगठन स्थापना गरेको एसोसिएशनका नामबाट प्रेषित विज्ञप्तिमा उल्लेख छ ।

डेनमार्कको मिडलफाटमा २८ जना भूटानी प्रतिनिधि र तीनजना डेनिश प्रतिनिधिबीच औपचारिक छलफल बसेपछि बैठकले पूर्णबहादुर दाहाल अध्यक्ष, कमल कोइराला उपाध्यक्ष, लालबाहादुर विष्ट कोषाध्यक्ष र थुग्तेन दोर्जी डुक्पा प्रमुख संयोजक रहने गरी  १३ जनालाई केन्द्रिय सदस्यमा चयन गरेको बताइएको छ ।

यसैबीच चारजना भूटानी,  कुलचन्द्र, टिकामाया तिवारी, लोकनाथ गुरुंगलगायत दलबाहादुर राईलाई  क्षेत्रीय संयोजकका रूपमा छानिएको छ। 

 

यस संगठनले प्रत्येक नेपालीभाषी भूटानीलाई भई-परिआएका संकट तथा जटिलतालाई निकास दिँदै नयाँ देशमा समाजलाई नयाँ बाटो देखाउने र भूटानी संस्कृति तथा नेपाली लीपिको जगेर्ना गर्ने, सामाजिक कार्यमा भूटानी पहिचान देखाउने उद्देश्य लिएको जनाउँदै शरणार्थी शिविरमा समाजसेवामा योगदान पुर्याएका पाँचजना अर्जुन घताने, चम्फा र्राई, विष्णु अधिकारी, भोला अधिकारी र बिर्खबहादुर भण्डारीलाई सल्लाहकार समितिमा राखेको संगठनका मूल संयोजक थुग्तेन दोर्जी डुक्पाले भूटान समाचार सेवालाई जनाएका छन् ।

डेनिश भूटानीहरूको यो प्रयासलाई अन्य देशमा रहेका अधिकांश भूटानीहरूले सराहना गर्दै उदाहरणीय कार्य गरेको बताएका छन् ।

6 COMMENTS